એલોન મસ્કની Starlink ભારતમાં: પ્લાનના ભાવ જાહેર..

એલોન મસ્કની સેટેલાઈટ ઈન્ટરનેટ સેવા સ્ટારલિંક (Starlink) ભારતીય બજારમાં પ્રવેશ માટે અંતિમ તબક્કામાં હોવાનું લાગી રહ્યું છે. લાંબા સમયથી ચાલી રહેલી ચર્ચાઓ બાદ, સ્ટારલિંકે તેની ભારતીય વેબસાઇટ પર રેસિડેન્શિયલ (રહેણાંક) પ્લાનના માસિક ચાર્જની જાહેરાત કરી દીધી છે, જે ભારતીય ડિજિટલ કનેક્ટિવિટી ક્ષેત્રમાં મોટો ફેરફાર લાવી શકે છે.

જાહેર કરાયેલી વિગતો મુજબ, સ્ટારલિંક રેસિડેન્શિયલ પ્લાનનો માસિક ચાર્જ ₹8,600 પ્રતિ મહિનો નક્કી કરાયો છે. આ ઉપરાંત, ગ્રાહકોએ એક વખત ₹34,000નો હાર્ડવેર કિટનો ખર્ચ પણ ચૂકવવો પડશે. કંપની નવા ગ્રાહકોને તેમની સેવાનો અનુભવ કરવા માટે 30 દિવસનો ફ્રી ટ્રાયલ પણ ઓફર કરી રહી છે.

સ્ટારલિંક આ પ્લાનમાં અનલિમિટેડ ડેટા આપવાનો દાવો કરી રહી છે, જેનો અર્થ છે કે ગ્રાહકોને ડેટા વપરાશની કોઈ ચિંતા રહેશે નહીં. કંપનીનો દાવો છે કે તેમની સેવા 99.9% અપટાઇમ સાથે કામ કરે છે અને તમામ પ્રકારના હવામાનમાં મજબૂતી જાળવી રાખે છે.

સ્ટારલિંકની મુખ્ય ઉપયોગીતા તે વિસ્તારોમાં છે જ્યાં પરંપરાગત બ્રોડબેન્ડ અથવા ફાઇબર નેટવર્ક પહોંચી શક્યા નથી. ગામડાઓ અને દૂર-દૂરના વિસ્તારોમાં હાઇ-સ્પીડ ઇન્ટરનેટ પહોંચાડવાનો સ્ટારલિંકનો મુખ્ય ઉદ્દેશ છે. સેટઅપની વાત કરીએ તો, કંપની દાવો કરે છે કે ઇન્સ્ટોલેશન અત્યંત સરળ છે. ગ્રાહકે માત્ર હાર્ડવેર કિટને પ્લગ-ઇન કરવાની રહેશે અને કનેક્શન શરૂ થઈ જશે.

હાલમાં સ્ટારલિંકે માત્ર રેસિડેન્શિયલ પ્લાનના ભાવ જાહેર કર્યા છે. જોકે, કંપની તરફથી સંકેત મળ્યા છે કે આવનારા અઠવાડિયામાં કોમર્શિયલ અને એન્ટરપ્રાઇઝ ગ્રાહકો માટેના બિઝનેસ પ્લાનની વિગતો પણ જાહેર કરવામાં આવશે.

સ્ટારલિંકની ભારતીય રણનીતિને વધુ મજબૂત કરતા, સ્પેસએક્સ (SpaceX) એ બેંગ્લુરુમાં પેમેન્ટ્સ મેનેજર અને એકાઉન્ટિંગ મેનેજર જેવી પોસ્ટ માટે હાયરિંગ પ્રક્રિયા શરૂ કરી દીધી છે, જે ભારતમાં લાંબા ગાળાની યોજનાનો સંકેત આપે છે. જો તમામ સરકારી મંજૂરીઓ મળી જાય તો સ્ટારલિંક ભારતના ડિજિટલ કનેક્ટિવિટી લેન્ડસ્કેપમાં મોટો પરિવર્તન લાવી શકે તેમ છે.